Tu Ho Gaya azaad?

By Subodh P Bais ( Rajput )

Ye badalon ki unchai tak pohchne ke liye,

Kaise pankh chahiye?

Agar mai woh pankh haasil kar lun,

Kya wahan tak pohoch jaaunga?

Ye badi badi imaaratein darati hain mujhe,

Kahin ye chaand ki roshni na chheen lein.

Sab log is daud mein lage baithe hain,

Par mujhe is daud ka hissa nahi banna.

Mujhe dekhna hai khula aasmaan,

Aur safed badalon ke paar ki duniya.

Kehte hain sapno ki nagri mein sapne poore hote hain,

Mera bhi ek sapna hai azaad hona.

Aisa nahi ke mere paas pankh nahi,

Aur udan ki disha nahi.

Bas ye andekhi zanjeerein tootni chahiye.

Jis din tooti,

Us din mai udd jaaunga

Us aasmaan mein,

Jahan imaaratein mujhe daraati nahi,

Jahan mai sapno ki us nagri ko chhoo sakta hoon.

Wahan main khud se milunga,

Aur kahunga "Tu ho gaya azaad. Ab udd le."

Par agar kabhi hawa zor se chale,

To tu bhi uth jaayega neend se.

By Subodh P Bais ( Rajput )